【亂去牙漬 愈搞愈黃】

亂去牙漬 愈搞愈黃

咖啡、奶茶、紅酒,是很多香港人的至愛,但日日飲,牙齒容易變黃起漬。為搶救儀容,不少貪靚一族用盡千方百計,除試勻坊間的美齒產品,就連土炮偏方都不放過。但牙醫警告,盲舂舂亂替牙齒美白,隨時適得其反,分分鐘愈搞愈黃,且後患無窮。

試過多種美白法

講到美白牙齒,Kennis算是半個「專家」,經驗一籮籮,「我用過美白牙膏、美白牙貼,亦試過搵醫生幫我漂牙,近排就用緊小梳打粉、幼鹽來刷牙。」Kennis之所以經常鑽研不同的美齒方法,皆因她嫌自己的牙齒又黃又灰,「我鍾意飲濃茶、咖啡、朱古力奶,總之係深色、濃味嘅嘢,我都鍾意。但飲完、食完,牙齒就慢慢吸收晒呢啲食物、飲品嘅顏色,搞到棚牙長期都有污漬,唔係咁好睇。」

L1305_010_02

崇尚天然的Kennis,棄用牙膏,以薑粉刷牙,每星期另會拌入少許幼鹽或小梳打粉,目的是幫助牙齒「磨砂」和美白。

L1305_010_03A

香港牙醫學會會長梁世民表示,牙齒的色澤,主要來自牙齒外層的琺瑯質及內層的象牙質。琺瑯質天生是透明或乳白色的,象牙質則泛微黃,但後天的因素,包括飲食及生活習慣、年齡增長,甚至是藥物,都會令牙齒的色澤產生變化。

民間秘技去牙漬

他續稱︰「咖啡、紅酒、濃茶、中藥,甚至係吸煙,都會令琺瑯質變色,產生污漬,但呢啲其實都唔會真係改變咗你牙齒真正嘅顏色,只要透過洗牙,就可以展現番原本嘅顏色出來。」不過,Kennis就懶得經常去診所洗牙,她愛用朋友傳授的「秘技」去美白牙齒。

Kennis說:「以前我都有用美白牙膏,但始終係化學物質,吸收得太多,擔心對身體唔好,加上我有皮膚敏感,覺得都係少用為妙。所以,朋友教我用薑粉刷牙,薑粉有消炎、殺菌、除口臭嘅功效。另外,一星期我亦有一至兩次,會再拌入一啲幼鹽或小梳打粉刷牙,作用係幫啲牙『磨砂』、美白。我試咗呢啲方法大半年,覺得效果幾好,可以磨走牙齒表面一啲比較深色嘅漬,亦唔覺有副作用。」

shutterstock_201222101

咖啡、紅酒、濃茶、中藥和香煙都會在牙齒產生污漬,其實透過洗牙已經可還原本來顏色。

醫生對偏方有保留

但梁世民醫生卻對Kennis的偏方有保留,「鹽係好粗糙嘅東西,用鹽來刷牙,等同『省』牙,感覺上係乾淨咗、唔見咗啲漬,但其實已經傷害咗琺瑯質。」
他補充,坊間部分美白牙膏、去漬牙粉等產品,原理同出一轍,都是透過一些粗糙微粒去打磨牙齒表面牙漬,達到美白功效,但長期使用,牙齒反而會變得更黃更敏感。

粗糙粒子易招牙敏感

「最初用,牙漬可能真係會少咗,但用耐咗,就會發覺啲牙嘅顏色可能比之前更加黃。原因係呢啲粗糙微粒,將琺瑯質磨薄咗,令象牙質透多咗出來。當琺瑯質受損,對牙齒嘅保護就會減少,咁就容易有牙齒敏感及其他問題出現。」

事實上,隨年歲增長,象牙質亦會變厚,使牙齒看上去愈來愈黃,這情況,或許要靠漂牙才能打救得到。但講起漂牙,Kennis就連聲說怕怕,「我試過跟廣告去買美白牙貼返屋企自己漂,不單無效果,仲搞到啲牙赤赤痛,我擔心成分有問題,以後都唔敢再用。」

美白牙貼 非人人適用

梁世民醫生指出,坊間的美白牙貼主要含低濃度的過氧化氫(hydrogen peroxide)或碳醯胺過氧化物(carbamide peroxide),是利用化學藥劑,深入牙齒的琺瑯質及象牙質,使牙齒恢復原本的顏色。「雖然坊間買得到嘅美白牙貼,所含漂白劑嘅濃度都好低,但如果你有蛀牙、牙周病、牙肉紅腫、發炎等等嘅口腔問題,呢啲漂白劑就足以令到你牙齒酸軟、痺痛、牙肉受損。」

他說,類似情況,屢見不鮮,經常有病人在使用美白牙貼後感到牙痛不適而求醫,故呼籲市民,如要使用美白牙貼,最好先找牙醫檢查清楚是否有牙患,並徵詢醫生意見後才使用。

L1305_010_04_002

L1305_010_05

不論是坊間購買的美白牙貼(上)或牙醫主理的家居漂牙(下),都要使用漂白劑,只是前者的濃度較低,而且牙貼屬現成,並不如家居漂牙般度身訂做,因此有機會令漂白劑溢出,傷及牙肉。

護齒疑惑

問:洗牙會磨掉牙齒表面的琺瑯質嗎?

答:超聲波洗牙機是靠超聲波的高頻震動來擊碎牙石,因此不會損害琺瑯質。

問:我難以戒掉咖啡、濃茶等高色素飲料,牙齒是否就亮白無望?

答:那就唯有盡可能使用飲管,減少飲料與牙齒接觸,而飲用後亦要立即漱口,避免色素停留在口腔並在牙齒上沉澱。

問:電動牙刷的潔齒功能,是否比手動牙刷更勝一籌?

答:對長者或手部不靈活的人士來說,電動牙刷不失為一個良好的輔助工具,但對一般人而言,只要有正確的刷牙方法,用什麼牙刷其實分別不大。

資料來源︰香港牙醫學會會長梁世民

「四環素牙」最難搞

撞過板的Kennis,後來也有兩次乖乖找過牙醫替她進行專業漂牙,這兩次雖然再沒不適,但效果卻一般,Kennis慨嘆,始終找不到方法對付她一排又灰又黃的「四環素牙」!「我細個時身體唔好,成日病,食過好多抗生素,我估都包括有四環素,所以搞到啲牙嘅底色都變晒灰。後生女時,我好介意呢棚牙,連笑都就住就住,怕會露齒,只係而家年紀大咗,睇得開啲,但都仲係好想搵方法整靚佢。」

梁世民醫生不諱言,即使是牙醫提供的專業漂牙療程,對「四環素牙」也幫助不大,「呢類病人可能要考慮做搪瓷貼或牙套,將整隻牙覆蓋住,先可以修飾到牙齒嘅色澤。但不論搪瓷貼或牙套,都要將隻牙磨細啲,先可以貼到或套到上去,所以對牙齒係有實質上嘅傷害,呢點要留意。」

L1305_010_06A_002

藍光漂牙主要藉藍光催化高濃度的漂白劑,只要約一小時,即可達到美白效果,比傳統家居漂牙更方便快捷。

準新郎藍光漂牙

相比Kennis,準新郎李先生的牙齒便亮白得多,如果按牙醫常用的色卡作比對,李先生的牙齒介乎於A2至A3級五個色階之間,較大部分亞洲人介乎A3至A3.5級四個色階來說,他算是稍白。只是李先生婚期在即,為求在大婚之日,能以最佳狀態示人,才偕同未婚妻一起到牙醫診所進行藍光漂牙。「我無比較過其他方法,都係上網睇到人講,話藍光漂牙出來嘅效果最好,牙齒會最白,所以就選擇咗呢個方法。」李先生笑說。

L1305_010_08_002

準新郎李先生大讚藍光漂牙令他笑得更有自信,只嫌過程較為辛苦,牙齒感到酸軟痺痛。

家居漂牙 VS藍光漂牙

牙科醫生唐逸謙指出,其實傳統的家居漂牙或近年流行的藍光漂牙,兩者都是使用高濃度漂白劑,因此出來的效果也差不多,平均可增白十個色階,只是後者有藍光作催化作用,所以需時較短,便能得出美白效果。「其實都係睇番自己嘅需要,傳統家居漂牙嘅收費比藍光漂牙低近一倍,但花嘅時間就多啲。牙醫要先幫你倒牙模,然後度身訂做一個牙托,之後病人每晚要喺牙托上唧啲漂白啫喱,戴住一個小時,要連續做兩個星期先有效果,有啲人會嫌麻煩。」

藍光漂牙 過程辛苦

想省時快捷,那就要像李先生般選擇藍光漂牙,他只是在診所花了一小時,便把牙齒增白了五至八個色階,達至B1級,但過程倒有點辛苦,他甚至痛得無法完成整個療程。李先生解釋︰「每十分鐘為之一次療程,醫生話,如果做晒四次,美白效果會最好,但我只係做咗三次就頂唔順要放棄,因為真係覺得啲牙齒好酸軟痺痛,而且唔舒服嘅感覺隨每次療程遞增上去。」

雖則如此,但李先生仍然十分滿意效果,「我四月影結婚相,希望到時仲係保持到啲牙咁白啦!醫生話,原則上,可維持到一至兩年,但都要睇點保養,我而家都盡量忍口,飲少啲奶茶、中國茶,以前我每日飲幾杯。」
L1305_010_07

牙齒按潔白及光暗度可粗略分為十九個色階,香港人普遍處於A3至A3.5級別。

美白大鬥法

坊間美白牙齒的方法五花八門,成效不一,各有利弊,選擇前宜考慮清楚。

L1305_010_AAA_002

話你知

刷牙人人都會,但是否正確,又是另一回事。想知自己方法是否正確,並掌握更多護齒貼士,可瀏覽衞生署口腔健康教育組網頁,當中有詳細講解。

網址︰http://www.toothclub.gov.hk

引致牙齒變黃的因素很多,牙齒酸蝕是其中之一。經常吃酸性食物或飲料,會令琺瑯質軟化,最終導致酸蝕。要避免這情況,當然要盡量少接觸酸性食品,而進食後就不要立即刷牙,至少相隔三十分鐘,否則只會傷上加傷。

轉載至 Next Health Channel:

http://health.next.hk/treatment/%E4%BA%82%E5%8E%BB%E7%89%99%E6%BC%AC%E3%80%80%E6%84%88%E6%90%9E%E6%84%88%E9%BB%83/

Leave a Reply

Your email address will not be published. Required fields are marked *

WhatsApp WhatsApp us